2021 жылы 17 желтоқсанда Түмен облысындағы Қазақ мәдениеті күндері шеңберінде Қазақстан мен Ресей арасындағы дипломатиялық қатынастардың 29 жылдығына және Қазақстан Республикасы Тәуелсіздігінің 30 жылдығына арналған «Шексіз достық» мерекелі фестивалі өтті.
«Түмен облысы қазақтарының ұлттық-мәдени автономиясы» аймақтық қоғамдық ұйымы ұйымдастырған концерт аясында қазақ халқының ұлттық дәстүрлерін көрсететін балалар мен жастар көркемөнер ұжымдарының ұлттық ойындары мен қойылымдары ұсынылды. Сонымен қатар, көрермендер «Жас ұрпақ» қазақ би мектебі тәрбиеленушілері, әнші Венера Рамазанова, «Арман» қазақ ән, «Мерей» қазақ вокалдық және «Гүлдер» қазақ би ансамблдерінің орындалуында халықтық және танымал билер, әндер мен күйлер тамашалады.
Мәдени іс-шараға Қазақстанның Түмендегі Құрметті консулы Владислав Квасов, Түмен облысының Ұлттар істері жөніндегі комитетінің төрағасы Владислав Чернов, Түмен облысының думасы, мемлекеттік органдар, ұлттық бірлестіктерінің үйлестіру кеңесі, іскерлік және мәдени топтарының өкілдері, сондай-ақ жергілікті қазақ қоғамдық ұйымдарының басшылары қатысты.
