2021 жылғы 8 сәуірде Қазақстанның Омбыдағы Консулдығының басшысы Ырысқали Дәуренбек А.С.Пушкин атындағы Омбы мемлекеттік облыстық ғылыми кітапханаға барып қайтты.
Омбының кітапханасы 1907 жылғы қаңтар айында Омбы қалалық думасының шешімімен құрылған, ал 1995 жылғы сәуір айында кітапхананың жаңа ғимараты ресми түрде ашылып, оған «Омбы мемлекеттік облыстық ғылыми кітапханасы» деген статус берілген. Аймақтағы ең үлкен болып саналатын кітапхананың қорында қазіргі кезде 4 миллионға жуық кітап бар, ал тіркелген оқырмандардың саны 148 мың адамнан асқан.
Кітапхананың директоры Александр Ремизовпен болған кездесу барысында Казақстанның Консулдығымен бірлесіп өткізуге болатын іс-шаралар мен кітапхана қызметіне қатысты мәселелер талқыланды. Кітапхананың ғимаратында өткен экскурсия кезінде кітап қоймасының мүмкіндіктері мен ұлы қазақ зерттеуші, ағартушы және саяхатшы Шоқан Уәлихановтың есімімен байланысты құнды кітаптар мен сирек кездесетін басылымдар көрсетілді.
